එදවස
යටගිය දවස දඹදිව බ්‍රාහ්මණයෝ වෛශ්‍යයන්ගේ ධනයෙන් මහත් වූ පිටියෙක මහත් වූ වේදිකාවක් කරවා ඒ වේදිකා මස්තකයේ ක්ෂත්‍රියයන්ද තුමූද මුලසුනෙහි වඩා හිදුවා අග්නි, මරුත්, චන්ද්‍ර, සූර්ය, පර්ජන්‍ය, මේඝ, විජ්ජු, ඌෂස්, පෘථිවි සහ වරුණාදී මහත් වූ උත්කර්ෂවත් යාග කරන්නෝය. එතැනට පිවිසීමට අවසර නොළද වේණ, නේෂාද, රථකාර, පුක්කුස, චණ්ඩාලාදී ශුද්‍රයෝ යාගය කෙරෙන මහත් වූ පිටිය දෙසැ දුරින් සිටැ හොරෙන් බල බලා සුසුම් හෙලන්නෝ "අහෝ එයනම් මහත් වූ ආශ්චර්යවත් උත්සවයෙකි. මහ පිනෙකි. මතු ආත්මයෙක බමුණු කුළයේ හෝ කැත් කුලයේ ඉපිද එවන් උත්කර්ශවත් යාගයෙක දෙවියන්ට පමණක් දෙවැනිව ඉද පින ලබන්නට ලැබේවා" යි පතා සාදුකාර දෙන්නෝය.
මෙදවස
නූතන බමුණෝ පුරහද පායන දිනෙක වෛශ්‍යයන්ගේ ධනයෙන් මහත් වූ සාලා කරවා, ඒවායේ අසූ කෙලක් පළතුරුද, අසූකෙළක් සත් වණක පුෂ්පයෝද ගොඩගසා, විසිකේලක තෛලයේ බහාලූ පාංකඩ දවමින්, නූතන ක්ෂත්‍රීයයෝ මුලසුනෙහි තබා, මහත් උත්කර්ශයෙන් යාග කරන්නෝය. එතැනට පිවිසුම් අවසරය නොළද නූතන ශුද්‍රයෝ ඒ මහත් වූ යාග වෛශ්‍යයන්ගේ විදු සන් පෙට්ටියෙන් දකින්නෝ "අහෝ අපේ පිං පාට කැත් කුලය දිනේවා. මීළග භවයේ අපිද කැත් කුලයේ උපදීවා" යි පතමින් හඩ නගමින් දොහොත් මුදුණින් සාදුකාර දිදී වදින්නෝය.
(උපුටාගැනීම සද්ධර්මරත්නාවලියෙන් නොවේ)
No comments:
Post a Comment