මේ සංකල්ප දෙක සම්බන්ධයෙන් බොහෝ දෙනක් අනවබෝධයෙන් කටයුතු කරන බවක් පෙනී යනවා. ඒ හේතුවෙන් ඒ සංකල්ප දෙක පැහැදිලි කිරීම සහ ඒ දෙකේ වෙනස පැහැදිලිව ඉරක් ඇද පෙන්වීම අවස්ථානුකූල යැයි මා හිතනවා.
නිරාගමිකයා
නිරාගමිකයෙක් කියන්නේ කුමන හෝ හේතුවක් මත ආගමික විශ්වාසයක් පිළි නොගන්නා කෙනෙක්. ඒ අතර ආගම් පිළිබදව විශ්වාසය බිදී තිබීම ආගමක් හෝ ආගමික සංස්ථාවක් සමග ඇති තරහ හෝ එදිරිවාදී කම වැනි හේතු මත නිරාගමික වූ අය වගේම හේතුවාදය එනම් යමක් උපතින් උරුම වීම, භක්තිය, ශ්‍රද්ධාව, කර්මයට හෝ සර්වබලධාරියෙකුට ඇති බිය සහ යහපත් ප්‍රතිවිපාක වලට ඇති ආසාව මත අවිචාරවත්ව පිළිගැනීම ප්‍රතික්ශේප කරමින්, විවෘත මනසින් යමක් විචාරශීලීව විමසා බලන අය වෙන්නටත් පුළුවන්. ඒ අනුව හේතුවාදීන් එක්තරා ස්වරූපයක නිරාගමිකයන් යැයි කිව හැකි වුවත් නිරාගමිකයන් = හේතුවාදීන් වන්නේ නැහැ.
නිරාගමික රාජ්‍යය නැමති බිල්ලා
නිරාගමික රාජ්‍යයක් යනු නිරාගමිකයන්ගෙන් එනම් ආගම් විශ්වාස නොකරන්නන්ගෙන් පිරුණු රටක් බවට අර්ථකථනයක් සෑම තැනම තිබෙනවා මා දුටුවා. ඒ අර්ථකථනය සම්පූර්ණයෙන්ම වැරදියි. නිරාගමික රාජ්‍යය යනු නිරාගමිකයන්ගේ රාජ්‍යය ලෙස ගතහොත් ඒ තුල ආගම් ඇදහීම වැනි මිනිසාගේ නිදහස් අයිතිවාසිකම් තහනම් කෙරෙනවා ඇතැයි ඇතිවන බියක් හේතුවෙන් නිරාගමික රාජ්‍යය බිල්ලෙකු මෙන් පෙනෙන්නට පුළුවන්. සැබැවින්ම නිරාගමික රාජ්‍යයට ඔය වැරදි අර්ථකථනය ආගමිකයන් විසින් සපයන්නේ නොදැනුවත්ව නොව දැන දැනම හිතාමතාමයි. නිරාගමික රාජ්‍ය සංකල්පය විනාශකාරී එකක් ලෙස හුවා දක්වා එය ප්‍රතික්ශේප කිරීමට අවිචාරවත් ජනතාව පෙළඹවීමයි එහි අරමුණ.
සැබැවින්ම නිරාගමික රාජ්‍යයක් යනු කුමක්ද?
නිරාගමික රාජ්‍යයක් ලෙස සැබැවින්ම අදහස් වන්නේ රාජ්‍ය පාලනය සදහා ආගම හෝ ආගමික සංස්ථාව අදාළ කර නොගන්නා රටක්. එවන් රටක ආගමික හේතූන් මත පණවන ලද නීති ඇත්තේ නැහැ. සැමට අදාළ වන්නේ එක නීතියක්. ආගමික විශ්වාස මත යම් වෙනසක් වෙනවා නම් එය රටේ නීතියට පටහැණි නොවන අන්දමින් තමන්ගේ පෞද්ගලිකත්වයේ සීමාව තුල සිටිමින් කරගත යුතු වෙනවා.
ඒ අනුව කිසිම ආගමකට නීතිය තුල විශේෂ පිළිගැනීමක් හෝ රාජ්‍ය අනුග්‍රහයක් ලැබෙන්නේ නැහැ. ආගමික උත්සව දිනවල සාමාන්‍ය දිනයක මෙන්ම මත්පැන්හල් මස් අලෙවිසැල් පමණක් නොව ඕනෑම ආයතනයක් විවෘතව තැබෙනවා. එදින මත්පැන් සහ මස් කෑමෙන් වැලකෙන්නට කැමති අයට නිවාඩු ලබන්නට කැමති අයට පෞද්ගලික මට්ටමින් එය සිදුකරගැනීමේ හැකියාව පවතිනවා මිස ඒ ආගමික විශ්වාසය පිළි නොගන්නා අය ලවාත් බලෙන් ඒවා කරවීමට අවස්ථාව ලැබෙන්නේ නැහැ.
පුද්ගල හැදුනුම්පත් උප්පැන්න සහතික හෝ නීතිය ඉදිරියේ පිළිගන්නා කිසිදු ලේඛනයක පුද්ගලයාගේ ආගම ඔහුගේ නිළ අනන්‍යතාවයේ කොටසක් ලෙස ඇතුලත් වන්නේත් නැහැ. ඒ අනුව ආගම යනු අවශ්‍ය නම් පිළිගැනීමටත් අකමැතිනම් බැහැර කිරීමටත් හැකි අති පෞද්ගලික කාරණාවක් බවට පත් කෙරෙනවා.
ඒ අනුව සැබැවින්ම නිරාගමික රාජ්‍යයක් යනු ආගම් නොඅදහන්නන්ගේ රටක් කියනවාට වඩා නිවැරදි වන්නේ රාජ්‍ය පාලන ක්‍රමය තුල ආගම හදුනා නොගන්නා රටක් යන්නයි. එහිදී කිසිදු ආගමකට රාජ්‍ය පිටිවහල නොලැබීම තුල ආගමික විෂමතා මත ගැටුම් කළහකාරී තත්වයන් ඇතිවීම සැළකිය යුතු ලෙස සීමා වෙනවා. කෙසේ වෙතත් ආගමික උත්සවයක් දිනයක යම් ආගමක වත් පිළිවෙත් සහ නීති ඒ ආගමේ නොවන අය මත සහ නිරාගමිකයන් මත බලෙන් පැටවීම කිසිම න්‍යායක් යටතේ සාධාරණ වන්නේ නැහැ. ආගම අනුව පුද්ගලයන් පංතිකරණයට ලක්කිරීමත් ඒ වගේම අසාධාරණයි. ඒ සියල්ලට පිළිතුර නිරාගමික රාජ්‍යය සංකල්පය තුල තිබෙනවා. එය ඉතාම වටිනා එමෙන්ම දියුණු රාජ්‍ය පාලන ක්‍රමයක් වන්නේ ඒ නිසා. එය සැබැවින්ම ආගමිකයන් නිරාගමිකයන් ඇතුලු සියල්ලන්ගේ උතෝපියාවක්.
No comments:
Post a Comment