දේශපාලන ගල් ඉබ්බන්

දේශපාලනයේදී පමණක් නොව යුද්ධයකදී පවා ප්‍රතිපාර්ශවය ඇතුලේ ගල් ඉබ්බන් ස්ථානගත කිරීම ඉතාම සූක්ෂම යුධෝපක්‍රමයක් වන්නේය. ඒ හරහා යුද්ධය හෝ අරගලය සතුරු පෙරමුණේ සිට විකෘති කිරීමට කෙනෙකුට අවස්ථාව ලැබේ. 

 

එසේ ස්ථාන ගත කරන පුද්ගලයන් ගල් ඉබ්බන් ලෙස මා විසින් හදුන්වනු ලැබීමට හේතුවක් ඇත. මේ පුද්ගලයන් සතුරු පෙරමුණේ ස්ථානගත වී සිටියද එකී පෙරමුණ වෙනුවෙන් තීරණාත්මක භූමිකාවක් ඉටු නොකරයි. ඔවුන් ගල් ඉබ්බෙකු සේ තමන්ගේ ඝනකම් කටුවේ ආරක්ෂාව යටතේ හිස දෑත් දෙපා සහ වල්ගය සගවා ගෙන සිටින්නේ අවශ්‍ය අවස්ථාව උදා වන තුරුය.

 

මුහණට මුහුණලා කරන සටනක වේවා වාග් සටනක වේවා දේශපාලන සටනක වේවා ප්‍රතිපක්ෂයෙන් නැගෙන අභියෝග ප්‍රශ්න වලට ඒ ආකාරයෙන්ම මුහුණ දීම අපහසු වෙයි. එවන් විටෙක අමාරු ප්‍රශ්නයක් පිළිතුරු දීමට පහසු ප්‍රශ්නයක් බවට සංස්කරණය කර නැවත යොමු කිරීම බොහෝවිට සිදුකරන්නේ ප්‍රතිපක්ෂයේ උපක්‍රමිකව ස්ථානගත කර ඇති ගල් ඉබ්බන්ය. 

 

එවිට අවිචාරවත්ව සහ අන්ධ පක්ෂපාතීත්වයකින් යුතුව සටන් පෙරමුණ දෙස බලා සිටින දේශපාලන සාක්ෂරතාවයක් හා විවෘත මනසක් නොමැති අයෙකුට පෙනෙන්නේ එය විරුද්ධ පාර්ශවයෙන් යොමු කරන ලද ප්‍රශ්නයක් විලසිනි. නමුත් සැබැවින්ම එය පිළිතුරු දීමට පහසු සංස්කරණයක් ලෙස ගල් ඉබ්බෙකු ලවා යොමු කරවා ගත්තකි. 

 

ඒ අනුව ප්‍රතිපක්ෂයෙන් යොමුවන අතිශය වලංගු ප්‍රශ්නයක් පවා මෝඩ ප්‍රශ්න ලෙස බාහිරට පෙනෙයි. එයට තමන්ගේ පාර්ශවය වීරත්වයෙන් යුතුව ඉදිරියට පැන පහරදී සුණු විසුණු කළ බවද පෙනෙයි. නමුත් එය සම්පූර්ණයෙන්ම නාටකයකි. එහි තමන්ට භාර කරන කොටස ඉටු කරන ගල් ඉබ්බා ඊළග අවස්ථාව එන තුරු කටුව තුල සැගවෙයි. 

 

එමෙන්ම ප්‍රශ්නයක් නොමැති අවස්ථාවක වාසිය සදහා ප්‍රශ්නයක් ඇති බව මවා පෙන්වීමටද යොදාගන්නේ ගල් ඉබ්බන්ය. 

 

උදා:-

A පාර්ශවය සහ B පාර්ශවය අතර දිගුකාලීන එදිරිවාදී කමක් වෙයි. A පාර්ශවයේ නායකත්වය X නැමැත්තා දරයි. X ගේ දේශපාලනික පැවැත්ම තීරණය වන්නේ A හා B පාර්ශවයන් අතර අර්බුදය දිගින් දිගටම පැවතීම මතය. මන්ද දේශපාලනිකව ඉතාම දුප්පත් X අර්බුද නිරාකරණය හැර අන් කිසිවක් නොදනී. එබැවින් A සහ B පාර්ශවයන් අතර අර්බුදයක් පැවැතීම අවසන් වන්නේ යම් දිනෙකද එදින X ගේ පැවැත්මේ අවශ්‍යතාවයද අවලංගු වී යන්නේය.

මෙය මැනවින් අවබෝධ කරගන්නා X උපක්‍රමයක් ලෙස B පාර්ශවයේ ස්ථාන දෙකක Y සහ Z ස්ථානගත කර ඇත. එවිට A පාර්ශවයේ ජනතාවට A සහ B අතර අර්බුදයක් ඇතැයි නැවත නැවත පෙන්විය යුතු අවස්ථා වලදී Y සහ Z මාරුවෙන් මාරුවට B පාර්ශවයේ ඉදිමින් උග්‍ර A විරෝධී සහ B පාක්ෂික අන්තවාදී ප්‍රකාශ සිදු කරති.

එය අසන අවිචාරවත් A පාර්ශවකරුවන් "අඩේ අර බලාපල්ලා. ඌ කොහොමද එහෙම කියන්නේ? අපේ ගැලවීම X පමණයි. වරෙල්ලා ඌව රකින්න. වරෙල්ලා ඌව ශක්තිමත් කරන්න" යැයි කියමින් X වටා රොද බදිති. අවශ්‍යතාවය ඉටුවූ වහාම Y සහ Z නැවතත් තම තමන්ගේ ගල් ඉබි කටු තුළ සැගවෙති. නැවත මතුවන්නේ X වෙනුවෙන් නොසන්සුන්තාවයක් ඇතිකළ යුතු අවස්ථා වලදී පමණි.

දේශපාලනික ගල් ඉබ්බන් හදුනාගැනීම පහසු නැත. එය දැඩි විමසිල්ලෙන් බැලුවද යම් අවස්ථා වලදී කළ නොහැක්කි. එසේ ගල් ඉබ්බන් හදුනා ගැනීම සදහා ඇත්තේ එකම ක්‍රමයක් පමණි.

උදාහරණයේදී කියූ Y සහ Z සිදුකරන ප්‍රකාශ අත්‍යවශයෙන්ම A පාර්ශවයේ ජනයා කුප්පන ඒවා වන විට B පෙරමුණේ සිට එකී ප්‍රකාශ කිරීම B පෙරමුණට ඇති ඵලදායීත්වය සහ ඒ ප්‍රකාශ මත A පාර්ශවයේ ඇතිවන නොසන්සුන්තාවය B පාර්ශවයට බලපාන ආකාරය තුලනාත්මක ලෙස මැන බැලීමෙන් පමණි එය වටහා ගත හැක්කේ. එය අතිශය සංකීර්ණ ක්‍රියාවලියකි. 

 

එම තත්වය යටතේ දේශපාලනය යනු කාලීන ප්‍රවෘත්ති ලෙස පමණක් හදුනාගන්නා බොහෝ දෙනෙකු මෙම ගල් ඉබි සංකල්පය කිසිදා හදුනා නොගන්නවා ඇත. එබැවින් දේශපාලන ගල් ඉබ්බා යනු අවිචාරවත් ජනතාවක් සිටින සමාජයක සැමදා අතිශය ඵලදායී දේශපාලනික උපක්‍රමයක් වනවා ඇත.