පාතාල ලෝකයට පාතාල ලෝකය කියන්නේම එය සාමාන්‍ය ජනයාට සම්පූර්ණයෙන්ම දැකිය නොහැකි සැඟවුණු ක්‍රියාවලියකින් ධූරාවලියකින් සමන්විත වෙනම පද්ධතියක් වන බැවිනි. බොහෝ විට ඒ පිළිබඳව පාතාල ලොකයට උපක්‍රමිකව වැදී පර්යේෂණාත්මක අධ්‍යනයක් කරන කෙනෙකුට පවා එහි දිග පළල, සීමා මායිම් නිෂ්චිතව කීම කළ නොහැක්කකි.
සමාජ අවශ්‍යතාවයකට පිළිතුරක්
මානව සමාජයේ ආරම්භක අවධියේ පටන්ම පාතාල කටයුතු සිදුවී තිබේ. ඕනෑම රටක ඕනෑම සංස්කෘතියක පාතාල ක්‍රියා යම් ප්‍රතිශතයකින් හෝ අන්තර්ගත වේ. පාතාලය බිහි වන්නේ සමාජ අවශ්‍යතාවයකට පිළිතුරක් වශයෙනි. සාමාන්‍ය පිළිගත් ක්‍රමවේදයක් යටතේ ඉටුකරගත නොහැකි අරමුණු ඉටුකරගැනීම සඳහා පාතාල ක්‍රියාකාරකම් භාවිතා වේ.
ඉහළ සිට පහළම සමාජ ස්ථරය දක්වා
පාතාලය සමාජයේ ඉහළම මට්ටමේ සුපිරි පැලැන්තියේ සිට පහළම මට්ටම දක්වා ව්‍යාප්ත වූවකි. එහි විල්ලුද පලස් මත තැබූ සැප පුටු වල වාඩිවී තීරණ ගන්නා God Fatherලාගේ සිට කිලිටි සරමක් ඇඳගෙන පිහිය ඉණේ රුවාගෙන ගොස් මනුෂ්‍ය ඝාතනයක් කරන තැනැත්තා දක්වාද එතැනින් පහළට මත්ද්‍රව්‍ය සිල්ලරට අලෙවි කරන්නා හෝ ගණිකාව දක්වාද විවිධ චරිත වෙයි.
පාතාලය මුලිනුපුටා දැමීම?
පාතාලය සමාජ අවශ්‍යතාවයකට පිළිතුරක් වන තාක් කල් එය සියයට සියයක් මුලිනුපුටා දැමීම කළ නොහැක්කකි. පාතාලය මුලිනුපුටා දැමීමට නම් මානව අවශ්‍යතාවන්ගෙන් සියල්ලම පාහේ පිළිගත් ක්‍රමවේදය යටතේ ඉටුකරගැනීමට හැකියාව ඇති විය යුතුය. ඒ පිළිබදව මෙහි ඉදිරි පරිච්ඡේදයක සාකච්ඡා කෙරේ. නමුත් එය සියයට සියයක් ළගා කරගත නොහැකි තත්වයකි. නමුත් මිනිස් අවශ්‍යතා දෘෂ්ටිවාදවලට ගැතිවීමෙන් තොරව පිළිගත් සමාජ පද්ධතිය තුලට ගෙන ඒමෙන් පාතාලයේ අවශ්‍යතාවය යම්තාක් දුරකට ප්‍රහීන කිරීමට හැකිවනවා ඇත.
සමාජයේ මත්ද්‍රව්‍ය සඳහා සමාජ ඉල්ලුමක් පවත්නා තාක් මත් ද්‍රව්‍ය සැපයුම කුමන හෝ මුහුණුවරකින් සිදුවේ. ජනතාවගේ ලිංගික අවශ්‍යතා පිළිගත් රාමුව තුල ඉටු නොවන තාක් කල් ගණිකාව සමාජයේ අත්‍යාවශ්‍ය භූමිකාවක් ඉටුකරන්නෙකු බවට පත්වේ. කෙනෙක් ඉවත් කළ විට ඉතා පහසුවෙන් සමහරවිට ඊට වැඩි ගාස්තුවකට තව කෙනෙකු එතැනට ආදේශ වෙයි.
පාතාලය ඉහළම සමාජ මට්ටමේදී
ඉහළම සමාජ මට්ටම් වලදී මුදල් ඉපයීම සඳහා මෙන්ම සමාජයේ ඉහළම මට්ටමේදී නිර්මාණය වන මුදල් හා බලය මගින් සියල්ල කළ හැකිය සියල්ල කළ යුතුය යන මනෝභාවය විසින් පාතාලයට අවශ්‍යතාවයක් නිර්මාණය කරයි.
පාතාලය නඩත්තු වන බරපැන
ඒ අනුව ශ්‍රී ලංකාවේ පාතාලය නඩත්තු වන ක්‍රම ප්‍රධාන වශයෙන් තුනකි.
1. පාතාල ක්‍රියාකාරකම් සඳහා අයකරන ගාස්තු
මුදලක් ගෙවා යම්කිසි අපරාධයක් ඝාතනයක්, පහරදීමක්, බිය වැද්දීමක්, මුදල් අයකරගැනීමක් සිදුකර ගැනීමට අවශ්‍ය අය ගෙවනු ලබන ගාස්තු මෙහිදී පාතාලයේ ආදායම් මාර්ගය වේ. මෙය සාමාන්‍යයෙන් පාතාලයේ පැවැත්මේ පැරණිතම මූලාශ්‍රය ලෙස ගත හැකිය.
2. කප්පම්
විවිධ හේතූන් මත සමාජයේ විවිධ තරාතිරම් වල පුද්ගලයන්ට හෝ ඔවුන්ගේ පවුල් වල අයට හෝ හිතවතුන්ට යම් හානියක් පමුණුවන බවට තර්ජනය කර ඒ හානිය නොපැමිණවීම සඳහා මුදල් අයකිරීම, යම්කිසි ව්‍යාපාරයක හෝ ව්‍යාපෘතියක ආයෝජිත මුදලින් යම් ප්‍රතිශතයක් ප්‍රදේශයේ පාතාල නායකයා ලබාගැනීම මෙන්ම පුද්ගලයන්ගේ රහසිගත තොරතුරු හෙළිදරව් කරන බවට තර්ජනය කොට කප්පම් ලබාගැනීම පාතාලයේ තවත් ප්‍රධාන ආදායම් මාර්ගයකි.
3. පාතාලය විසින්ම ක්‍රියාත්මක කරන පාතාල ව්‍යාපාරික කටයුතු
මෙහිදී විශේෂයෙන්ම සමාජ ඉල්ලුමක් සහිත මත්ද්‍රව්‍ය, නීති විරෝධී මත්පැන් හෝ ගණිකා ජාවාරම, ශරීර කොටස් ජාවාරම වැනි ක්‍රියා ව්‍යාපාර මට්ටමින් පවත්වාගෙන යමින් එයින් ආදායම් සහ ලාභ ඉපයීමයි. වර්තමානය වන විට පාතාල ලෝකයේ සාම්ප්‍රදායික ආදායම් මාර්ග වලට වඩා මෙම ක්‍රමය ප්‍රධාන ආදායම් මාර්ගය බවට පත්වීමේ ප්‍රවණතාවය දැකිය හැකිය. එය ශ්‍රී ලංකාවේ පමණක් නොව සමස්ථ ලෝකයේම පාතාල ලෝකයට අදාළව ඇතිවූ තීරණාත්මක පරිවර්තනයකි. මෙයට අනුගත වීම ප්‍රතික්ෂේප කළ පාතාල නායකයෝ අහෝසි වී ගියහ. ඒ පරිවර්තනය පිළිබඳව කතා කරන පර්යේෂණාත්මක නිබන්ධන, නවකතා මෙන්ම චිත්‍රපටද රාශියක් තිබේ.
පාතාලයේ හැඩය වෙනස් වීම
පාතාල ව්‍යාපාර කටයුතු පාතාලයේ ප්‍රධාන ආදායම් මාර්ගය බවට පත්වීමත් සමඟම සමාජ සමීකරණයේ පාතාලයට පැවැති ස්ථානයේද තීරණාත්මක වෙනසක් විය. එනම් මේ පාතාල ව්‍යාපාරික කටයුතු වලින් උපයන අධික මුදල ඔවුන් සේවකයාගේ තැනසිට හාම්පුතුන්ගේ තැනට ඔසවා තබන ලදී.
ඒ අනුව මීට පෙර දේශපාලන බලය හා මුදල් බලය තිබූ පැලැන්තියක් විසින් නඩත්තු කරන ලද පාතාලය, පාතාලය විසින් දේශපාලන හා සල්ලිකාර පැලැන්තිය නඩත්තු කරන තත්වයක් දක්වා වෙනස් විය.
දේශපාලනය හා පාතාලය
මේ තුල දේශපාලනඥයන්ට අධික ලෙස මුදල් ලබා දෙමින් ඔවුන්ගේ මැතිවරණ ප්‍රචාරක කටයුතු ආදියෙහි බරපැන දැරීමෙන් පාතාලය විසින් දේශපාලනඥයන් ප්‍රායෝගිකව මිළදී ගැනීම සිදුවිය. පෙරදී අවශ්‍ය අවස්ථාවට පමණක් කැඳවා වැඩ ගැනීමට පසෙක තබා තිබුණු පාතාලයට ණය වීමෙන් ඔවුන් ආරක්ෂා කිරීමටත් ඔවුන්ගේ පාතාල කටයුතු සඳහා ඍජුව මෙන්ම වක්‍රව පහසුකම් සැළසීමට සිදුවන තැනට දේශපාලනඥයා පත්විය.
ඉහළ සිට පහලට තදින් වෙලා ගැනීම
ඒ හරහා සමාජයේ ඉහළම දේශපාලන පැලැන්තියේ සිට එහි පහතම ඉම දක්වා ඉතාම තදින් පාතාලය හා බැඳී ගියේය. මේ දෙපාර්ශවයේම පැවැත්ම අන්‍යොන්‍ය වශයෙන් රඳා පවතින එකක් බවටද බොහෝවිට දේශපාලනඥයා පාතාල මුදල් මත රඳා පවතින තැනකටද පත්විය.
සුපිරි සුදු කරපටි අණදෙන්නන්
මේ හේතුවෙන් පාතාලය මෙහෙයවන එහි ඉහළින්ම සිටින අයට තවදුරටත් පාතාල නායකයන් ලෙස පෙනී සිටීමට තිබූ අවශ්‍යතාවය අහෝසි වී ගියේය. ඒ සඳහා මුදල් ගෙවා පුද්ගලයන් තබාගත් ඔවුන් සමාජයේ ඉහළමපෙලේ ධන කුවේරයන් දානපතියන් ලෙස පෙනී සිටීමට පටන්ගත්හ.
වැටුප් ලබන සේවකයන් පමණක් සමාජයට පෙන්වීම
යම් හෙයකින් පාතාල ක්‍රියාකාරකමක් සම්බන්ධයෙන් පොලිස් අත්අඩංගුවට පත්වීම, අධිකරණයට ඉදිරිපත්වීම පමණක් නොව ඇතැම්විට ජීවිතාන්තය දක්වා සිරගත වීමට පවා ඉදිරිපත් වන්නේ පාතාලයේ ඉහළම වැජබෙන සුදු කරපටි අණ දෙන්නන් නොව ඊට බොහෝ පහළ මට්ටමක සිටින වැටුපට සේවය කරන තැනැත්තන් වේ. තාක්ෂණික අර්ථයෙන් ගත්කල එහි වරදක්ද නොපෙනේ. අදාළ අපරාධය කළ තැනැත්තා සිරගත වනවා ඇත. ඔහුගේ පවුලේ නඩත්තුව ආදී වියහියදම් ඉහළින්ම වැජබෙන අපරාධයට අණ දුන් සුපිරි සුදු කරපටි අණ දෙන්නන් බලාගන්නවා ඇත.
පාතාල මර්ධනය
පාතාල මර්දනය මාතෘකාවක් බවට පත්වන්නේ මෙවැනි වාතාවරණයක් යටතේය. දේශපාලන අධිකාරිය විසින් පාතාල මර්දනය සඳහා පොලීසියට දැඩි උපදෙස් දුන් බව මාධ්‍ය ඔස්සේ පළවිය. ඊට පසුදාම පාතාල කල්ලි සාමාජිකයෙකු වෙඩි හුවමාරුවකදී මිය ගියේය. මෙය පාතාලය මර්දනය වනවා දකින්නට කැමති සමාජයේ සාමාන්‍ය වැසියන්ගෙන් සැළකියයුතු කොටසකගේ අමන්දානන්දයට හේතු විය. මෙය බැලු බැල්මට පාතාලය මර්දනයට පාතාලයේම ක්‍රමය යොදාගැනීමක් ලෙස ගත් පිරිස් එයට ප්‍රීති ඝෝෂා කරනු දක්නට ලැබිණි.
නමුත් පාතාලයේ සැබෑ සැකැස්ම මෙන්ම එකී ඝාතනයේ වියහැකිතාවයන් සළකා බැලීමේදී ප්‍රීතියකට වඩා පත්වන්නට සිදුවන්නේ විමතියකටය. මන්ද ඒ මියගිය තැනැත්තා පාතාල සාමාජිකයෙකු ලෙස ගත්තද ඔහුගේ මරණය කිසි ලෙසකින් පාතාලය අකර්මණ්‍ය නොකරයි. ඔහුගේ ස්ථානයට ඉතා පහසුවෙන් තවත් හත්දෙනෙකු පමණ ආදේශ වනවා ඇත.
අනෙක් කරුණ ඔහුගේ මරණයෙන් ඔහු යොදාගනිමින් සිදුකල වෙනත් මහා පරිමාණයේ අපරාධයක් සම්පූර්ණයෙන්ම වැසීගියා වන්නටද හැකිය. ඒ සියල්ලද පිළිගැනීමට සිදුවන්නේ ඔහු පාතාල සාමාජිකායෙකු බවට පොලීසිය කරන ප්‍රකාශය පිළිගැනීමෙනි.
සේයා සදෙව්මි ඝාතන සිද්ධියේදී විශ්වාසය මුළුමනින්ම පාහේ අහිමි කරගත්, කුඩු කන්ටේනර් ගණන් අත්අඩංගුවට ගනිද්දී ඒ කන්ටේනරය ළඟ සිටි උන්ගෙන් එහාට කිසිවකු අනාවරණය කරගැනීමට අසමත් වූ පොලීසිය කරන ප්‍රකාශයක් මත සමස්ථ නිගමනය පදනම් කරගැනීමේ ඥානාන්විත භාවය නැවත සිතා බැලිය යුතු එකකි.
ඒ සියල්ල සිදුවද්දී පාතාලයේ සුපිරි සුදු කරපටි අණ දෙන්නන් කිසිදු අතුරු ආන්තරාවකින් තොරව වැජබෙති. සමාජය ඒ කවුරුන්ද යන්න පවා නොදනිති. එය පුදුසයට කරුණක් නොවේ. පාතාලයට පාතාලය කියන්නේ එබැවිනි.
No comments:
Post a Comment