සරසවියෙන් උරුම වූ දේශපාලනික දුප්පත්කම

මම කොළඹ විශ්ව විද්‍යාලයේ නීති පීඨයට එන්නෙ 2008 දි. එතකොට නීති පීඨයේ ශිෂ්‍ය දේශපාලනයේ ඒකාධිකාරය දැරුවේ නිදහස් නීති ශිෂ්‍ය සංවිධානය. අපි අහලා තියන විදියට නිදහස් නීති ශිෂ්‍ය සංවිධානය 1992දි බිහිවෙලා සියත නීති ශිෂ්‍ය සංවිධානය හෙවත් ජෙප්පන් සමග විශාල අරගලයකින් පස්සෙ තමයි ඒ වගේ ඒකාධිකාරී තත්වයකට ඇවිත් තිබුණෙ.

නිදහස් නීති ශිෂ්‍ය සංවිධානයේ තිබුණෙ සරළ ප්‍රතිපත්ති දෙකයි. එකක් නවකවදයට එරෙහි වීම. අනෙක බාහිර දේශපාලන පක්ෂවලට පීඨයේ අභ්‍යන්තර දේශපාලන කටයුතු සදහා අත පෙවීමට ඉඩ නොදීම. පළමු ප්‍රතිපත්තිය ගැන මම මෙතනදි මොකවත් කියන්න යන්නෙ නෑ. නමුත් දෙවන ප්‍රතිපත්තිය ගැන පශ්චාත් විග්‍රහයක් කරන්න මේක හොද වෙලාවක් කියල හිතනව. 

නීති පීඨ ආපන ශාලාවෙ ලොකු අකුරින් ගහල තිබුණ පුරවර පින්බිමේ භේද නැත නොයෙක් පෙදෙසේ සබද නුඹ නිදහස් කියල. ඒකෙන් අදහස් කරන්න ඇත්තෙ එක විදියකින් කාටවත් ගැති නෑය කියන අභිමානවත් සිතුවිල්ල. අනිත් එක දේශපාලන මතිමතාන්තර අරභයා ශිෂ්‍යයෝ අතර ආරාවුල් නෑ කියන දේ. 

නිදහස් නීති ශිෂ්‍ය සංවිධානයේ නිළ ගීතිය විදියට තෝරගෙන තිබ්බෙ වික්ටර් රත්නායකයන්ගෙ සදහිරුතරු පවතිනතුරු අපි මැරෙන්නෙ නෑ ගීතය. ඒක පහත දැක්වෙන විදියට වෙනස් කරගෙන තිබ්බ:-

සදහිරු තරු පවතිනතුරු
අපි මැරෙන්නෙ නෑ (freedom)
අනග තරුණ බඹරු අපි
අමර වරම අපට හිමි
අපි මැරෙන්නෙ නෑ
අපි මරන්ඩ බෑ (freedom)

කලක මෙහෙන් චුතවෙනවා (ජෙප්පො.. ජෙප්පො..)
එළොව ගිහින් වැජබෙනවා (ජෙප්පො.. ජෙප්පො..)
පෙළපත නම වෙනස් වෙලා
ආයෙත් මෙළොවට එනවා
එහෙම වුණත් කිසිම දිනක
අපි මරන්ඩ බෑ (freedom)

හැරමිටියෙන් ඇවිදින්නෝ (ජෙප්පො.. ජෙප්පො..)
අපට එරෙහි වී එන්නෝ (ජෙප්පො.. ජෙප්පො..)
සීමා මායිම් වැටකොටු
ඒ කිසිවක් අපිට නැතේ
වැරදීමෙන් හුස්ම ගියත්
අපි මැරෙන්නෙ නෑ (freedom)

කිසිම දේශපාලන පක්ෂයකට ගැති නොවීම නිදහස් නීති ශිෂ්‍ය සංවිධානයේ හෙවත් ෆ්‍රීඩම් එකේ මූලික හරයක් වුණත් ඒකෙ මුඛ පරම්පරාගත සාහිත්‍යය ඒ කියන්නෙ ඔය සින්දුව සහ ෆ්‍රීඩම් එකේ තෙල අධ්‍යයනය කරද්දි පේන දෙයක් තමයි හැම වෙලාවෙම ජෙප්පො ප්‍රධාන විරුද්ධවාදී කණ්ඩායම විදියට සළකලා ක්‍රියා කිරීම. හ්ම්... ඒක ටිකක් හිතල බලන්න වටින දෙයක්. ඇයි අපක්ෂපාතී නොබැදි පිළිවෙතක්නම් එක කණ්ඩායමකට විතරක් දැඩි සේ විරුද්ධ? 

ඒක මම තේරුම් ගත්තෙ මේ විදියට. නිදහස් නීති ශිෂ්‍ය සංවිධානය බිහි වෙන 1992 කියන්නෙ ශ්‍රී ලංකාව ජවිපෙ දෙවෙනි කැරැල්ලෙන් බැට කාල ඉවර වේගෙන ආප කාලෙ. විශේෂයෙන් එතනදි ෆ්‍රීඩම් එකේ මතයට ප්‍රධාන පිටිවහල වෙන්න ඇත්තෙ ශාස්ත්‍ර පීඨයේ එක්සත් ශිෂ්‍ය සංවිධානය. දයා පතිරණගෙ ඉදන් එන ඉතිහාසය බැලුවාම ඔවුන් සැමදා ජවිපෙ විරෝධී. ඒ අභාෂය මත ෆ්‍රීඩම් එකේ මුඛ පරම්පරාගත සාහිත්‍ය සාකල්‍යයෙන්ම ජවිපෙ විරෝධී වෙන්න ඇති. (මේ කොටස මට කවුරුවත් කියපු දෙයක් නෙමෙයි. මට දැනගන්න ලැබුණ දේවල් වලින් මම හිතාගත්ත හැටි. වැරදිනම් කවුරුහරි නිවැරදි කරන්න.)

දැනගන්න ලැබුණ විදියට අපි විශ්ව විද්‍යාලයට එන්න කලින් අවුරුද්ද දක්වාම නීති පීඨයේ සියත නීති ශිෂ්‍ය සංවිධානය හෙවත් ජෙපි ක්‍රියාකාරීත්වය තිබිල තියනව. එතකොට තත්වෙ හිතාගත්තහැකි. දෙපාර්ශවයම බොහොම පැහැදිලිව කාලානුරූපව තමන්ගෙ තෙල් වෙනස්කරගෙන යාවත්කාලීන කරගන්නව වෙනුවට උත්සාහ කරන්න ඇත්තෙ අලුතින් එන බැච් එකෙන් පුළුවන් තරම් පිරිසක් තමන්ගෙ ගොඩට දාගන්න. ඒකෙන් මම හිතන විදියට වුණේ 1992 දි තිබුණ ආරවුලක් එහෙම ආරවුලක් නොතිබිය යුතු 2008 දක්වාම ඇදී ඒම. 

මට ෆ්‍රීඩම් තෙලේදි ආප පළවෙනි ප්‍රශ්නෙ තමයි ඇයි දැඩි ලෙස ජෙප්පො පිටු දකින්නෙ කියන එක. ඒකෙ මොකක්ද පදනම අහපුවාම 1992දි තිබූ තත්වයක් ගැන සහ ෆ්‍රීඩම් එක ගොඩනගන්න වෙච්ච මහන්සිය ගැන කියනව මිසක් පිළිගතහැකි තර්කානුකූල පිළිතුරක් දීපු කෙනෙක් නෑ. මම හාර හාර ඇහුවෙත් නෑ. මොකද ඒ කාලෙදි මට අවශ්‍ය වුණේ නෑ අනවශ්‍ය ප්‍රශ්න අහන කෙනෙක් විදියට ලේබල් වෙන්න. නමුත් කාලයත් එක්ක නීති පීඨයේ ෆ්‍රීඩම් එකත් ඉන්න ඇතැම් අයට පවා ඔය මට ආපු ප්‍රශ්නෙ ඇවිත් තිබුණ බව පෙනුණ. 

ඇත්තටම බැලු බැල්මට ශිෂ්‍ය දේශපාලන කණ්ඩායම් කිසිම දේශපාලන පක්ෂයකට ගැති නොවී ස්වාධීනව නිදහසේ ක්‍රියාත්මක වෙන එක කොච්චර හොදද? තම තමන්ට විශ්ව විද්‍යාලය තුල පවතින්න තමන්ගෙ පුරුදු දේශපාලන මතවාද වෙනස් කරන්න නොවෙනවනම් ඒක කොච්චර අගේද? ඒක තමයි ලිබරල් සමාජයක් කියන්නෙ. ෆ්‍රීඩම් එක දිහා බැලු බැල්මට කෙනෙකුට පේන්න පුළුවන් එහෙම. ඒත් ඒක ඒහෙමමද? හ්ම්... මම හිතන්නෙ නෑ කියල. 

මම නීති පීඨයට එන කාලෙ ෆ්‍රීඩම් කිව්වම එක පාර හිතට එන නිදහස් මතධාරීන්ගෙ උතෝපියාවක් විදියට නීති පීඨය ගැන කවුරුහරි හිතනවනම් ඇත්තටම ඒක වැරදියි. ඒ තුලත් තිබුණ මර්දනයක්, විරුද්ධ මතවාදීන් යටපත් කිරීමක් සහ අන්තිම ජරාජීර්ණ දේශපාලනයක්. නරකම දේ ඒ දේශපාලනය සහ ගැටුම් දේශපාලනික න්‍යායාත්මක මතවාදයන් මත පදනම් වෙලා සිදුවනවා වෙනුවට, බාහිර සමාජයේ වගේම අහවලාගේ මූණට අකමැති වීම, ආපු දවස්වල ඉදන් ඌ දිරවන්නෙ නැති වීම, ඒ පුද්ගලයාගේ පදිංචි ගම් ප්‍රදේශය, කල්ලිවාදය වගේ අන්තිම  දෙකයි පනහේ දේශපාලනික පදනමක් ඇත්තේම නැති පදනම් මත සිදුවීම. දේශපාලනික ගැටුම් දේශපානික නොවන පදනම් මත සිදුවෙනවා කියන්නෙ ඒක අන්තිම හිරිකිත වැඩක්. ඒ දේශපාලනයේ මමත් හිටියා. මර්දනය මමත් කළා. ඒක අවාසනාවක්. 

නිදහස් නීති ශිෂ්‍ය සංවිධානයේ ෆ්‍රීඩම් සංකල්පයෙන් ඇත්තටම සිද්ධ වුණේ විශ්ව විද්‍යාලයට එන ශිෂ්‍යයා නිදහසේ අලුත් මතවාද සොයා යාමට වඩා තමන් පරම්පරාවෙන් ගෙනාපු ගෙදරින් උරුම වෙච්ච කුණු ගද ගහන අපරිණත දේශපාලන මතවාද එක්ක කුණු වෙන එක. අවුරුදු හතරක් විශ්ව විද්‍යාලයක ඉදලත් තමන්ට කකුල් දෙකන් වැනෙන්නෙ නැතුව හිටගෙන කියන්න පුළුවන් දේශපාලන මතවාදයක් නීති පීඨයෙන් පිටවෙන ෆ්‍රීඩම් සාමාජිකයන්ගෙන් අතිමහත් බහුතරයකට තිබුණෙ නෑ. අදටවත් නෑ. 

මොකද එහෙම දේශපාලනික දැනුමින් සහ ආකල්ප වලින් පෝෂණය වෙන්න සුදුසු වටපිටාව ෆ්‍රීඩම් එක මගින් ස්වේච්ඡාවෙන් නැති කරගෙන තිබුණා. දේශපාලනික සාක්ෂරතාවයක් ඇතිකරගැනීමට උනන්දුවක් ඇති අතලොස්සක් සහ ස්වභාවයෙන්ම දේශපාලනික ඥාණය සොයා යන අතලොස්සක් හැරුණු විට අදටත් ෆ්‍රීඩම් සාමාජික වෙලා ඉදලා නීති පීඨයෙන් නික්මුණු වැඩි දෙනෙක් දේශපාලනිකව හරිම දුප්පත්. නීති ක්ෂේත්‍රයට සම්බන්ධ වෘත්තිකයන්ගෙ දේශපාලන සාක්ෂරතාවය දුප්පත් වීම කොයි තරම් ඛේදවාචකයක්ද කියල අමුතුවෙන් පැහැදිලි කළ යුතු යැයි මා සිතන්නේ නෑ. 

එහෙනම් මොකක්ද ඇත්තටම කරන්න තිබුණෙ එකක් තමයි නිදහසේ දේශපාලනයට නීති පීඨය තුලට එන්න ඉඩදීම. අපි තුන්වෙනි වසරෙ ඉද්දි ෆ්‍රීඩම් එකේ කැදවුම්කරු විදියට මම ඉන්න කාලෙ එක වෙලාවක ඕක ගැන සාකච්ඡා වුණා. නමුත් එතනදි යෝජනා වුණේ රටේ බලයේ ඉන්න දේශපාලන පක්ෂයට ලින්ක් එකක් හදාගැනීම තුලින් කපටි ලෙස ඔවුන්ගෙන් යම් යම් වැඩ කරවාගැනීම. හිනාවෙන්න එපා. එහෙම යෝජනා කළේ තුන්වන වසර නීති ශිෂ්‍යයො. ඒ කතාව එතරින් නතර වුණා. 

මම නීති පීඨයෙන් ඉවත් වුණාට පස්සෙ ඔය ගැන කල්පනා කරද්දි මට මෙහෙම හිතුණා. බැරිවෙලාහරි ෆ්‍රීඩම් එක ජෙපි වුණා නම්. සමහරුන්ට හිතන්නත් බය ඇති. තව සමහරුන්ට හිතන්නවත් අප්පිරියා ඇති. ඒත් මම පෞද්ගලිකව විශ්වාස කරනවා එහෙම වුණා නම් නීති පීඨයෙන් ඒ කාලෙ පිටවුණ අය මීට වඩා දේශපාලික අවබෝධයක් සාක්ෂරතාවයක් දැනුමක් ලබාගෙන පිටවෙන්න තිබුණා. මොකද මාක්ස්වාදී දේශපාලන ධාරාවකට යන්තමින් හෝ සම්බන්ධ වීමෙන් කෙනෙකු ලබන පන්නරය වෙනත් කිසිදු දේශපාලන ධාරාවකදි ලබන්න බෑ. ඒ ධාරා වලදි ඇත්තටම ලබන්න පුළුවන් ඇමති තුමාට මුට්ටියක් අල්ලලා සර් කියලා කණිපින්දම් කියලා දෙන දෙයක් අරගෙන ඒකෙන් තමන්ගෙ ජීවිත සුඛිත මුදිත කරගැනීමේ පාදඩ පන්නරය. මම ළගදි ඔය කතාව ඒ කාලෙ මගෙ නීති පීඨ සගයෙකුට කිව්වා. එයාගෙ උත්තරෙන් මම මේ සටහන ඉවර කරන්නම්

"හරි බං අතා මට කියපං ඇත්තටම දේශපාලනය කරන එකේ අරමුණ තමන්ට මොනවහරි කරගන්න එක නෙමේද?'

-සටහන
අථිල අතාවුද
හිටපු කැදවුම්කරු - නිදහස් නීති ශිෂ්‍ය සංවිධානය
2010/11